O Programa de Adopcións Especiais ten por obxecto promocionar a adopción de menores tutelados pola Xunta de Galicia que, polas súas características, non atopan familias que respondan ás súas necesidades.

Son nenos, nenas e adolescentes que por ter algunha das seguintes características: idade entre 8 e 17 anos, algún tipo de discapacidade (física, psíquica, sensorial) ou enfermidade, pertencer a un grupo de 3 ou mais irmáns,  teñen maiores dificultades para atopar unha familia que os adopte. Pero estes menores tamén teñen dereito a medrar co apoio, seguridade e afecto que só unha familia pode ofrecerlles.

A execución deste programa lévase a cabo en colaboración coa Fundación Meniños, en virtude dun convenio de colaboración asinado coa Dirección Xeral de Familia, Infancia e Dinamización Demográfica. A devandita entidade realiza labores de información e formación de familias así como de acompañamento e seguimento das adopcións desde que se constitúe a garda con fins adoptivos.

O procedemento para adoptar a un menor con características especiais é o mesmo que para calquera adopción nacional, se ben, pola súa especificidade, se proporciona ás familias unha formación e apoio adicional, tanto antes como despois da adopción.

Para coñecer máis en profundidade en que consiste o programa, pode poñerse en contacto coa súa xefatura territorial ou directamente coa entidade colaboradora da Xunta de Galicia:

Fundación Meniños

Avda de Cádiz, 5, 2º Edif. La Milagrosa

15008 A Coruña

Tfno: 881 896 101 - 676 618 924 - 678 752 393

e-mail: adopción.especial.t1@meninos.org - adopción.especial.t2@meninos.org