A idoneidade é a capacidade, aptitude e motivación axeitadas para exercer a responsabilidade parental, atendendo ás necesidades dos menores a adoptar, e para asumir as peculiaridades, consecuencias e responsabilidades que leva consigo a adopción.

A declaración de idoneidade require unha valoración psicosocial sobre a situación persoal, familiar, relacional e social das persoas que se ofrecen para a adopción, así como da súa capacidade para establecer vínculos estables e seguros, as súas habilidades educativas e a súa aptitude para atender a un menor en función das súas singulares circunstancias. Esa declaración de idoneidade  formalizarase mediante a correspondente resolución.

Non poderán ser declaradas idóneas para a adopción as persoas que se encontren privadas da patria potestade ou teñan suspendido o seu exercicio, nin as que teñan confiada a garda do seu fillo á Entidade Pública.

Os ofrecementos valóranse segundo a orde cronolóxica de presentación. Excepcionalmente, cando haxa carencia de persoas que se ofrecen para a adopción adecuadas para algún menor con especiais dificultades, poderá alterarse esta orde.

• Que entre  a persoa mais nova da parella  e o menor a adoptar haxa unha diferenza de idade axeitada e conforme coa lexislación interna. Esta diferenza non deberá ser maior de corenta e cinco anos. No caso de que estean en disposición de aceptar a grupos de irmáns ou a menores con especiais dificultades, a diferenza de idade poderá ser superior. 
• Que o medio familiar das persoas que se ofrecen para a adopción reúna condicións axeitadas para a atención integral do menor no referente á vivenda, medios de subsistencia, capacidade educativa, integración social e relación estable e positiva entre os seus membros.
• Que se aprecien nas persoas que se ofrecen para a adopción motivacións e aptitudes axeitadas. No caso de ofrecemento conxunto, esas motivacións e aptitudes deberán ser compartidas.
• Que as persoas que se ofrecen para a adopción teñan unhas condicións de saúde física e psíquica que lles permitan atender correctamente ao menor.